ဘယ်လိုလုပ်မလဲဗျာ။ ကျွန်တော်တို့ ဟိုတယ်ရဲ့ သူဌေးကချစ်တီးကျတော့၊ အကောင့်တင်းမန်နေဂျာကလည်း ချစ်တီးပိုကျတော့တာပေါ့။ ကျွန်တော်တို့ အုပ်စုဆေးစစ်ဖို့ကို ကုန်းကြောင်းသွားခိုင်း တယ်ဗျာ။ ဒီဟာလည်း ကျွန်တော်ဒူဘိုင်းကို ဒုတိယအကြိမ် ရောက်ခါစတုန်းကပါပဲ။ ကျွန်တော်တို့ ဟိုတယ်က Bur Dubai မှာဗျ။ ဆေးစစ်တဲ့ ဆေးရုံက Deira Dubai မှာ။ ဒူဘိုင်းရဲ့ ဟိုဘက်ကမ်းပေါ့ဗျာ။ လမ်းလျှောက်ရင် ၁ နာရီလောက် လျှောက်ရတာဗျ။ အစက သူတို့ပြောတော့ မဝေးဘူးနီးနီးလေးတဲ့။ မရောက်သေးတော့လည်း ယုံတာပေါ့ဗျာ။ လျှောက်ရင်း လျှောက်ရင်း မရောက်နိုင်တော့မှ အားလုံးကျိန်ဆဲမိကြတာပေါ့။
ကြည့်လေဗျာ။ လှည်းတစ်တန်၊ လှေတစ်တန်။ တမျှော်တခေါ်ကြီး လျှောက်ရပြီးတော့လည်း ရောက်မလား အောက်မေ့တယ်။ ...
မရောက်ဘူးဗျာ။ လှေစီးရသေးတယ်။ မော်တော်ပေါ့ဗျာ။ တဖက်ကကြည့်တော့လည်း ပျော်စရာလေးဗျ။ အဟဲ။ တစ်ယောက် တစ်ကျပ်တစ်ကျပ်စီ ပေးပြီး ၁၀ မိနစ်လောက် ဟိုဘက်ကမ်းကို စီးရတယ်။ လေတဟူးဟူးနဲ့ပေါ့ဗျာ။ အတွေ့အကြုံသစ်လေးတော့ ရတာပေါ့။ မြန်မာနိုင်ငံမှာ မော်တော် တစ်ခါမှ မစီးဖူးဘူး။ ဒူဘိုင်းရောက်မှပဲ မော်တော်စီးရတော့တယ်။
ဟိုဘက်ကမ်း ရောက်တော့လည်း ပြီးမလားကြည့်တယ်။ မပြီးသေးဘူးဗျာ။ လျှောက်ပါဦးပဲ။ ဒီလိုနဲ့ ကျွန်တော်တို့လည်း ချွေးတပြိုင်းပြိုင်းနဲ့ လျှောက်ရင်း နောက်ထပ် နာရီဝက်လောက်မှပဲ ဆေးရုံကိုရောက်တော့တယ်ဗျာ။ အထဲမှာလည်း ဆေးစစ်မယ့်သူတွေ ပြည့်ကျပ်နေတာပေါ့။ အမိုးမိုးထားပေမယ့် အပြင်အပူရှိန်က ဘယ်နေနိုင်မလဲဗျာ။ ပါလာတဲ့ ငွေစလေးနဲ့ ရေတစ်ဗူးပြီး တစ်ဗူးဝယ်သောက်ပြီး ကိုယ့်အလှည့်ကို စောင့်ရတာပေါ့။ ဒီဆေးရုံက ဒူဘိုင်းရဲ့ လုပ်သားအားလုံး ဆေးစစ်ရတဲ့ဆေးရုံပါ။ နေ့တိုင်းလူပြတ် သွားတဲ့ နေ့ဆိုတာ မရှိဘူးတဲ့။ နေ့တိုင်းလည်း အလုပ်သမားတွေက ရောက်နေတာကိုး။ ဒါပေမယ့်ဗျာ။ ကျွန်တော်တို့ အလှည့်ရောက်ခါနီးမှ ဒီနေ့ဆေးစစ်တာ ပိတ်သွားပြီဆိုပြီး ကျွန်တော်တို့ကို တာဝန်ယူတဲ့ ပွဲစားက လာပြောတယ်။ ကဲ... စဉ်းစားကြည့်။ ကျွန်တော်တို့ ဘယ်လောက် စိတ်ညစ်မလဲ။ နောက်နေ့ ဒီလိုပဲ လမ်းလျှောက်လာရ ဦးမယ်လေ။
0 comments:
Post a Comment