U.A.E ကိုမသွားခင် သိသင့်လို့

ကျွန်တော်တို့မြန်မာနိုင်ငံလို ယူအေအီးသံရုံးမရှိတဲ့ နိုင်ငံတွေအတွက် များသောအားဖြင့် ယူအေအီးဗီဇာကို အွန်လိုင်းကနေလက်ခံရယူရပါတယ်။ အရွယ်အစားကတော့ A4 ဆိုဒ်အရွယ်ပါ။ ဗီဇာလျှောက်ထားသူရဲ့ အချက်အလက်တွေနဲ့ ယူအေအီးလူဝင်မှုကြီးကြပ်ရေးရဲ့ တံဆိပ်တုံးပါဝင်ပါမယ်။ Visit Visa ဆိုရင်လျှောက်ထားသူအတွက် ယူအေအီးနိုင်ငံက Sponsor Company ရဲ့လိပ်စာပါရသလို Employment Visa ဆိုရင် အလုပ်လုပ်ရမယ့် Company နဲ့ လုပ်ရမယ့်မြို့ရဲ့လိပ်စာတွေ ပါဝင်မှာဖြစ်ပါတယ်။

အခုနောက်ပိုင်းမှာတော့ Visit Visa သမားတွေအတွက် Online ကရရှိလာတဲ့ဗီဇာစာရွက်ကိုယူပြီး ဒီကနေထွက်၊ ယူအေအီးလေဆိပ်ရောက်ရင် ပတ်စ်ပို့တ်စာအုပ်မှာတုံးထုပြီး နိုင်ငံထဲတန်းဝင်ရုံပါပဲ။ အရင်တုန်းကတော့ ယူအေအီးက Visa Section မှာ Original Visa နဲ့လဲရပါတယ်။ Employment Visa သမားတွေအတွက်ကတော့ ခုနကပြောသလို ယူအေအီးလေဆိပ်မှာ Original Visa နဲ့လဲပြီး အလုပ်ထဲဝင်ပြီးတဲ့နောက်မှ ပတ်စ်ပို့တ်စာအုပ်မှာ Sticker Visa ကိုကပ်ပါတယ်။

ကျွန်တော်အဓိကပြောချင်တာက ဗီဇာမှာပါရတဲ့ လျှောက်ထားသူရဲ့နာမည်ပါ။ အွန်လိုင်းဗီဇာမှာ

လျှောက်ထားသူရဲ့ နာမည်နဲ့အတူ ဖခင်ရဲ့နာမည်ကိုပါထည့်ရပါတယ်။ အာရဗ်တွေရဲ့ ထုံးစံကနာမည်မှည့်ရင် နာမည်ရဲ့နောက်မှာ အဖေနာမည်ကိုတွဲထည့်ရပြီး ရုံးဆိုင်ရာ၊ ကျောင်းဆိုင်ရာကိစ္စတွေမှာ နာမည်နဲ့အတူ ဖခင်နာမည်ကိုပါ တွဲခေါ်ပါတယ်။ အဲဒါကပြသနာပါ။ ကျွန်တော်တို့ မြန်မာနိုင်ငံသားအနေနဲ့က အနည်းအကျဉ်းလောက်ပဲ နာမည်မှာဖခင်နာမည် တစ်လုံးစ၊ နှစ်လုံးစ ပါတတ်ကြပါတယ်။ နှစ်သက်ရာနာမည်တွေကိုသာ များသောအားဖြင့် မှည့်တတ်ကြတာပါ။ ဒါကြောင့်မို့လို့ မြန်မာနိုင်ငံကနေဗီဇာတင်ခိုင်းရင် ကျွန်တော်တို့က လျှောက်ထားသူရဲ့ နာမည်တွေထဲက နောက်ဆုံးတစ်လုံးကို အဖေနာမည်အဖြစ် ထည့်ပေးလိုက်ပါတယ်။ (ဥပမာ- ကျော်သက်နိုင်ဆိုရင် အဖေနာမည်က Naing ပေါ့ဗျာ)။ အဲဒါက တစ်ချို့တစ်ချို့အတွက် ပြသနာမရှိပေမယ့် နာမည်နှစ်လုံးထဲသာရှိတဲ့ မြန်မာနိုင်ငံသားတွေအတွက်ကတော့ ပြသနာပါ။ (ဥပမာ- မသဇင် ဆိုပါတော့)။ အဖေနာမည် Zin ဆိုတာကို ထားပါတော့။ လျှောက်ထားသူနာမည်က Ma Tha ပေါ့။ ယူအေအီးလေဆိပ်ရောက်လို့ လ၀က ကသူ့ကို Ma Tha လို့ခေါ်ခဲ့ရင် ထူးနိုင်ရင်တော့ ကောင်းတာပေါ့။ ကြောင်တောင်တောင်ဖြစ်နေရင် ရှုပ်ကုန်ပါလိမ့်မယ်။

ဒါကတစ်ပိုင်းပေါ့။ နောက်တစ်ပိုင်းက မြန်မာနိုင်ငံ လ၀က နဲ့ပတ်သက်နေပါတယ်။ ၀တ်ရည် ဆိုတဲ့မိန်းကလေးတစ်ယောက် ယူအေအီးသွားဖို့ ဗီဇာကိုင်ပြီး မြန်မာနိုင်ငံလေဆိပ် လ၀က မှာ အစစ်ခံနေချိန်ပါ။ သူ့နာမည်က ခုနကျွန်တော်ပြောတဲ့ ရှုပ်နိုင်တဲ့နာမည်ထဲမှာ ပါဝင်ပါတယ်။ သူ့အဖေနာမည်က ဦးစိုးနိုင်ပါ။ ဗီဇာတင်တဲ့အချိန်တုန်းက ကျွန်တော်တို့က အဆင်ပြေအောင် အဖေနာမည် ဦးစိုးနိုင်ကို သူ့နာမည်ဝတ်ရည်နောက်မှာ ထည့်လိုက်မိပါတယ်။ (၀တ်ရည်စိုးနိုင် ပေါ့ဗျာ)။ ဒါကယူအေအီးဘက်မှာ အဆင်ပြေဖို့ပါ။ မြန်မာနိုင်ငံမှာတော့ သူ့အတွက်ပြသနာသွားဖြစ်ပါတယ်။ ကျွန်တော်တို့ကလည်း အစကတည်းက အကျိုးအကြောင်းပြောပြပြီး ရန်ကုန်လေဆိပ်မှာ အဆင်ပြေအောင်ပြောနိုင်ဖို့ ယူအေအီးအကြောင်းကို ရှင်းပြဖို့ ပြောထားပါတယ်။

အဲဒီနေ့က သူကလည်း ရန်ကုန်လေဆိပ်မှာ လ၀ကကို သေသေချာချာ ရှင်းပြပါတယ်။ ဟိုဘက်နိုင်ငံရဲ့ ထုံးစံအရ ဖခင်နာမည်ဦးစိုးနိုင်ကို နာမည်နောက်မှာ ထည့်ထားခြင်းဖြစ်ကြောင်း၊ မိမိနာမည်ရဲ့ဘေးမှာလဲ ဖခင်နာမည်နေရာမှာ ဦးစိုးနိုင်ပါရှိကြောင်း ပြောပြပါတယ်။ ဒါပေမယ့် သိကြတဲ့အတိုင်း ရန်ကုန်လေဆိပ်လ၀က က ပတ်စ်ပို့တ်နာမည်ဟာ ၀တ်ရည်ဖြစ်ပြီး၊ ဗီဇာနာမည်ဟာ ၀တ်ရည်စိုးနိုင်ဖြစ်နေတဲ့အတွက် လက်မခံနိုင်ကြောင်းနဲ့ ဗီဇာဟာမမှန်ကန်ကြောင်း၊ ထွက်ခွင့်မပေးနိုင်ကြောင်း ပြန်ပြောပါတယ်။

ဘယ်လိုတောင်းပန်ပန် မရပဲနဲ့ ဖြစ်နေချိန်မှာ နောက်ဆုံးသတိရတာနဲ့ အိတ်ထဲက လမ်းခရီးမှာသုံးဖို့ထည့်ထားတဲ့ အစိမ်းရောင် ၅၀ တန်တစ်ရွက်ကို ထုတ်ပေးလိုက်မှ ခုနကမမှန်ကန်တဲ့ ဗီဇာက မှန်သွားပါတော့တယ်။ ထွက်ခွာခွင့်လဲ ရရှိသွားပါတယ်။ ယူအေအီးကိုလာဖို့ ပြင်နေသူတွေအတွက် သတိထားဖို့၊ ၅၀တန်လေးတစ်ရွက် မထုတ်ရဖို့ (အခုဆို ၅၀ နဲ့ ရပါ့မလား)၊ ကြိုတင်သတိထားပြင်ဆင်နိုင်ဖို့ သတင်းပေးလိုက်တာ ဖြစ်ပါတယ်။

ဆက်လက်ဖတ်ရှုရန်..

QATAR လေယာဉ်-အေးဂျင့်ပုံပြင်

အလုပ်ကိစ္စတစ်ခုကြောင့် ကျွန်တော် Kingdom of Saudi Arabia(K.S.A) နိုင်ငံကို သွားခဲ့ရပါတယ်။ အဲဒီတုန်းက မြန်မာနိုင်ငံမှာ (K.S.A) သံရုံးမရှိသေးတော့ ကျွန်တော်တို့ (K.S.A) ဗီဇာကို Thai နိုင်ငံ Bangkok မြို့မှာသွားယူရပါတယ်။ ခရီးစဉ်အစအဆုံးကို ရန်ကုန်မှာရှိတဲ့ အေးဂျင့်တစ်ခုကို အပ်လိုက်တာပါ။ အေးဂျင့်ရဲ့ ပိုင်ရှင်နဲ့ကလည်း နဂိုကတည်းက ခင်မင်မှုရှိနေတာကတစ်ကြောင်း၊ သူကလဲ (K.S.A) ကိုသွားဖို့ကိစ္စရှိနေတယ်ဆိုတော့ အဖော်လဲရတယ်ဆိုပြီး အပ်ဖြစ်သွားတာပါ။

သူကပဲ Thailand Visa ကိစ္စ၊ (K.S.A) ဗီဇာကိုစ္စ၊ ရန်ကုန်- ထိုင်း -(K.S.A) အသွားအပြန်လေယာဉ်လတ်မှတ်ကိစ္စ အားလုံးကို တာဝန်ယူထားပါတယ်။ (စားစရိတ်၊ နေထိုင်စရိတ်မပါ။) ရန်ကုန်ကနေ ထိုင်းကိုကျွန်တော်တို့ Thai Air Asia စီးသွားပါတယ်။ လေယာဉ်ပေါ်မှာစားဖို့ ဒံပေါက်ထုတ်လေးတွေကို ကိုယ်စီကိုယ်စီ ၀ယ်သွားပါတယ်။(အားလုံးသိကြသလို Thai Air Asia က ဘတ်ဂျက်လိုင်းဆိုတော့ ရေသန့်ဘူးလေးတောင် မရပါဘူးခင်ဗျ) ထိုင်းနိုင်ငံဘန်ကောက်ကို ချောချောမောမော ရောက်ပြီး ဘန်ကာပီ က ရီးဂျင့်ဟိုတယ်မှာ တည်းကြပါတယ်။ အဲဒီမှာနေရင်းနဲ့ (K.S.A) ဗီဇာကို သွားတင်ပါတယ်။ ဘန်ကောက်မြို့ကိုလည်ပတ်ရင်း ဗီဇာကို စောင့်ရတာပေါ့ခင်ဗျာ။ (၈) ရက်မြောက်နေ့မှာ ...(K.S.A) ဗီဇာကို ရရှိပါတယ်။ဗီဇာရတာနဲ့ အဲဒီနေ့မှာပဲ (K.S.A) သွားဖို့ အစစအရာရာ ပြင်ဆင်ပါတော့တယ်။ ကြာကြာနေရင် ပါလာတဲ့ငွေစလေးတွေအတွက် စိတ်မချရသလို၊ ရန်ကုန်ကယူလာတဲ့ စားစရာရိက္ခာလေးတွေကလည်း (K.S.A) မရောက်ခင် ကုန်သွားနိုင်ပါတယ်။ ဒါကြောင့် သူကပဲနေ့ချင်း (K.S.A) သွားဖို့ လေယာဉ်လတ်မှတ် ကိုသွားဝယ်ပါတယ်။ (သူဆိုတာ ကျွန်တော့်ဘော်ဒါ အေးဂျင့်ပိုင်ရှင်ပါ။) Qatar Airline ပါ။ သူ့ကိုပဲကျွန်တော်က ခရီးစဉ်နဲ့ပတ်သက်ပြီး အားလုံးအပ်ထားတာဆိုတော့ လေယာဉ်လတ်မှတ်အပါအ၀င်၊ ပတ်စ်ပို့တ်စာအုပ်ကိုပါ ပေးထားပါတယ်။ ဒီလိုနဲ့ ဘန်ကောက်ကစထွက်တယ် ဆိုပါတော့ဗျာ။ Qatar Airline က (K.S.A) ကိုသွားဖို့ခရီးစဉ်မှာ ဘန်ကောက်ကနေထွက်ပြီး Qatar နိုင်ငံ Doha မြို့ကို Transit အတွက်ဆင်းပါတယ်။ Qatar Airport လည်းရောက်ရော ပြသနာကစပါတော့တယ်။ ဘာဖြစ်လို့လဲဆိုတော့ ကျွန်တော်ပြောင်းစီးရမယ့် လေယာဉ် (Qatar ကနေ (K.S.A) ကိုသွားမယ့်လေယာဉ်) ကနောက်နေ့ 3:00 pm မှထွက်မှာပါ။ ကျွန်တော်တို့ ကာတာကိုရောက်တာ လက်ရှိည 7:00 pm ပါ။ ထုံးစံကတော့ Airline ကဟိုတယ်ပေးရမှာပါ။ ကျွန်တော် အဲယားလိုင်းကို သွားပြောတော့ တာဝန်ရှိသူဝန်ထမ်းက ဟိုတယ်ဘောက်ချာပါမှသာ ဟိုတယ်ပေးမယ်လို့ ပြောပါတယ်။ ဟုတ်ပါတယ်ခင်ဗျ။ သူတို့အမှားတော့ မဟုတ်ပါဘူး။ လတ်မှတ်သွားဝယ်သူရဲ့ အပြစ်ပါ။ ကျွန်တော်လည်း ဒေါသထွက်ထွက်နဲ့ ကျွန်တော့်မိတ်ဆွေ အေးဂျင့်ပိုင်ရှင်ကြီးကိုပြောတော့ သူကမဆီမဆိုင် ဘန်ကောက်က အဲယားတစ်ကတ်ရုံးကို အပြစ်ဖို့ပါတယ်။ ဒီလိုနဲ့ပေါ့ဗျာ။

အဲဒီည 7:00pm ကနေ နောက်နေ့ 3:00pm အထိ Qatar Airpot က Tea Lounge မှာထိုင်ရင်း အချိန်ကုန်လွန်စေခဲ့ပါတယ်။ ဒီလိုနဲ့ (K.S.A) ကိုသွားမဲ့လေယာဉ်ထွက်ချိန်ကို ရောက်လာပါတော့တယ်။ တညလုံးစိတ်ညစ်ညစ်နဲ့ ထိုင်စောင့်လိုက်ရတာဆိုတော့ ကျွန်တော်လည်းဝမ်းသာအားရနဲ့ စောစောစီးစီးတည်းကပဲ ချက်အင်ဝင်ပြီး လေယာဉ်ထဲကို ၀င်ထိုင်နေလိုက်တာပေါ့ဗျာ။ သူကတော့ လေယာဉ်ထွက်ခါနီးမှာ အေးအေးဆေးဆေးရောက်လာပါတယ်။ ကျွန်တော်စိတ်သိပ်မကြည်တာကိုလဲ သိလို့နေမှာပေါ့။

ဒီလိုနဲ့လေယာဉ်လည်းစထွက်ပါတော့တယ်။ ကျွန်တော်လည်း မြန်မြန်ရောက်ဖို့ကို ဆုတောင်းရင်း လေယာဉ်ပေါ်က တီဗွီအစီအစဉ်လေးကိုကြည့်ပြီး နောင်ဖြစ်လာမယ့် ပြသနာနောက်တစ်ခုကို မသိပဲနဲ့ လိုက်ပါလာပါတယ်။ ဘာလဲဆိုတော့ လေယာဉ်မယ်က ခရီးသည်တွေအားလုံးရဲ့ ခါးပတ်တွေကို လိုက်စစ်ပါတယ်။ ခါးပတ်ပတ်ခိုင်းတာပါ။ တချိန်တည်းမှာပဲ လေယာဉ်မောင်းက " ကျွန်တော်တို့ လေယာဉ်ပျံဟာ ဘာရိန်းနိုင်ငံလေဆိပ်ကို ဆင်းသက်ပါတော့မယ်လို့ ကြေငြာပါတယ်။ ကျွန်တော်လဲ အဲဒါကိုကြားကြားချင်း ခေါင်းနဲနဲကြီးသွားသလို ခံစားရပါတယ်။ သူ့ကိုကြည့်လိုက်တော့ သူကလဲမသိသလိုပုံစံနဲ့ ခေါင်းလိုက်ကြီးပြပါတယ်။ သူ့ကိုအပြစ်ပြောလည်း မထူးတော့တာမို့ ကျွန်တော်တို့လေယာဉ်လတ်မှတ်တွေကို ထုတ်ကြည့်တော့ ခရီးစဉ်ထဲမှာ ဘာရိန်းထရန်စစ်ပါနေတာကို တွေ့ရပါတယ်။ ကျွန်တော်လည်း လတ်မှတ်ပေါ်က အဲဒီစာတမ်းလေးကို လက်ညှိုးနဲ့သူမြင်အောင် ထောက်ပြပါတယ်။ အဲဒီတော့မှ ငနဲသားက ကျွန်တော့်ကို တောင်းပန်ပါတယ်။ သူလတ်မှတ်ကို မကြည့်မိကြောင်း၊ လတ်မှတ်ရုံးမှာ သွားချန်တဲ့နေ့နဲ့၊ မြို့ကိုသာပြောပြခဲ့ကြောင်း၊ သူတို့ခရီးအစီအစဉ် ဘယ်လိုဆွဲပေးလဲဆိုတာကို မကြည့်ခဲ့ကြောင်း ပြောပြပါတယ်။ (အဲဒါအေးဂျင့်ရဲ့ ပိုင်ရှင်ဖြစ်နေလို့သာပေါ့)

ဘာမှမထူးတော့တာမို့ ကျွန်တော်လည်း လေယာဉ်ထိုင်ခုံပေါ်မှာ ငြိမ်ငြိမ်လေးလိုက်ပါလာရပါတယ်။ (ခုန်ချဖို့လဲ မရဲဘူး) ဘာရိန်းလေဆိပ်ကိုရောက်တော့ ကျွန်တော်တို့လိုပဲ ထရန်စစ်ခရီးသည်တွေက အများကြီးပါပဲ။ ထိုင်စရာထိုင်ခုံ အလွတ်တစ်ခုမှ မရှိတော့ အဆင့်အတန်းရှိရှိ ကြမ်းပြင်ပေါ်မှာပဲ ကျွန်တော်တို့ ထိုင်ချလိုက်ပါတယ်။ ကျွန်တော်လဲ စိတ်ညစ်ညစ်နဲ့ ကျန်နေသေးတဲ့ ရိက္ခာလေးတွေကို ထုတ်စားနေမိပါတယ် (စိတ်ညစ်ရင် ဗိုက်ဖြည့်ရပါတယ်။) ခဏနေတော့ သူက (သိပ်မကြာပါဘူးဗျာ။ နောက်တစ်နာရီဆိုရင် ပြန်ထွက်ရတော့မှာပါ) ဆိုပြီး ကျွန်တော့်ကို နှစ်သိမ့်ပါတယ်။

ဒီလိုနဲ့ လေယာဉ်ပြန်ထွက်ဖို့ အချိန်လဲနီးလာရော ကျွန်တော် Qatar Check In Counter ရှိရာကိုထွက်လာကြပါတယ်။ ကောင်တာရှေ့လဲရောက်ရော ကောင်တာက မဖွင့်သေးဘူးခင်ဗျ။ လတ်မှတ်ထဲမှာပါတဲ့ လေယာဉ်ထွက်ချိန်က နာရီဝက်ပဲလိုတော့တယ်။ ကျွန်တော်လဲ စဉ်းစားမနေတော့ပဲ ကာတာ လေယာဉ်ရုံးခန်းရှိရာကို သွားရတော့တာပေါ့။ ရုံးခန်းထဲက တာဝန်ရှိသူကိုလည်း မေးကြည့်ရော ခရီးစဉ်ဖျက်သိမ်းထားပါတယ်လို့ ပြောပါတယ်။ ကျွန်တော်လဲ ကွမ်ပလိန်းလုပ်ရတော့တာပေါ့။ ဒါပေမယ့် သူတို့ကခပ်တည်တည်ပါပဲ။ နောက်နေ့လေယာဉ်ကျမှ လိုက်သွားပါလို့ပြောပါတယ်။ ဒီနေ့ခရီးစဉ်မရှိတော့ပါဘူးတဲ့။ ရုံးခန်းတောင်ပိတ်ဖို့ ပြင်နေပါတယ်။ ဟိုငနဲကတော့ ခေါင်းကလေးငုံ့ ဇက်ကလေးပုနေပါတယ် (အဲဒီဇက်မပုထားရင် ကျွန်တော်တက်နင်းမိမှာ သေချာပါတယ်)။

နောက်ဆုံးကျွန်တော်လဲ လေဆိပ်မှာရှိနေတဲ့ BAHRAIN AIRLINE ရုံးခန်းကိုသွားပြီး ကာတာလိုင်းရဲ့ လုပ်ဆောင်ချက်ကို ပြောပြအကူအညီတောင်းပါတယ်။ BAHRAIN (GULF) AIRLINE ရဲ့တာဝန်ရှိသူတွေက ပထမတော့သူတို့နဲ့ မဆိုင်ကြောင်းပြောပြပါတယ်။ ဒါပေမယ့် ကျွန်တော်လည်း ကျွန်တော်တို့ဒုက္ခကို ပြောပြပြီး အတင်းအကြပ်အကူအညီတောင်းတော့ ခဏကြာရင်တော့ K.S.A ကိုထွက်မယ့် GULF လေယာဉ်ရှိကြောင်း၊ အဲဒီလေယာဉ်နဲ့ လိုက်သွားနိုင်ဖို့ ကူညီနိုင်ကြောင်း၊ ကာတာလေယာဉ်လတ်မှတ်ကို သူတို့ယူထားပြီး နောက်နေ့မှ သူတို့ကာတာအဲယားဝေးစ်နဲ့ ဆက်သွယ်ပြောကြားမှာဖြစ်ကြောင်း ပြောပြပါတယ်။ ကျွန်တော်လည်း ၀မ်းသာသွားပါတယ်။ သူ့တို့ကိုကျေးဇူးတင်စကားပြောပြီး GULF AIRWAYS CHECK IN COUNTER ကို တန်းပြေးပါတော့တယ်။ ဒါက ကျွန်တော့်အသွားခရီးမှာ ကြုံရတဲ့ Airline နဲ့ Agent ရဲ့ လက်ဆောင်တွေပဲ ဖြစ်ပါတယ်။

ဆက်လက်ဖတ်ရှုရန်..

HOTEL LIFE နှင့် U.A.E

ဟိုတယ်အလုပ်အကိုင်တွေ ခေတ်စားနေတဲ့ဒီအချိန်မှာ မြန်မာလူငယ်တော်တော်များများ ဟိုတယ်သင်တန်းတွေဘက်ကို အာရုံစိုက်လာကြပါတယ်။ ဟိုတယ်သင်တန်းတွေကလည်း ၀န်ဆောင်မှုအမျိုးမျိုးနဲ့ ဖိတ်ခေါ်လာတယ်။ လျှော့ဈေးတွေ အပြိုင်အဆိုင်ချပြီး သူတို့သင်တန်းကိုသာတက်ဖို့ ကြော်ငြာလာကြပါတယ်။ နိုင်ငံခြားဟိုတယ်အဖွဲ့အစည်းတွေရဲ့ အသိအမှတ်ပြုသင်တန်းတွေကလည်း သူထက်ငါအပြိုင်အဆိုင် ပေါ်ထွက်လာပါတယ်။ကျွန်တော်တို့ ယူအေအီးမှာတော့ ရောက်လာကြတဲ့သူတိုင်းလိုလို (ဟိုတယ်နဲ့ပတ်သက်ပြီး) ဟိုတယ်သင်တန်းတစ်ခုမဟုတ်၊ တစ်ခုကဆင်းလာကြတဲ့ သူတွေချည်းပါပဲ။

တစ်ချို့ကရန်ကုန်မှာ အင်တာဗျူးအောင်ပြီး ရောက်လာကြတယ်။ တချို့ကတော့ ပတ်သက်ရာပတ်သက်ကြောင်းနဲ့ ရောက်လာကြပါတယ်။ ဒီရောက်လို့လုပ်ငန်းခွင်ဝင်တဲ့ အချိန်မှာ စပြီးအခက်အခဲတွေ့တော့တာပါပဲ။ တကယ်တမ်းလုပ်ငန်းခွင်မှာ လက်တွေ့လုပ်ခိုင်းတော့ အစိမ်းသက်သက်သဘောမျိုးဖြစ်နေကြပါတယ်။ မေးကြည့်တော့ သင်တန်းမှာက များသောအားဖြင့် စာတွေ့ပဲသင်တယ်လို့ ပြောပါတယ်။ ON JOB TRAINING ဆင်းဖို့လွှတ်တဲ့ဟိုတယ်မှာကလည်း တောက်တိုမယ်ရလောက်ကိုပဲ လုပ်ခိုင်းတယ်လို့ ပြောပါတယ်။ (F&B PRODUCT သမားဆိုရင် ကြက်သွန်ပဲလှီးခိုင်းတယ်တဲ့ ခင်ဗျ) သင်တန်းနံမည်ကိုမေးကြည့်တော့...
ရန်ကုန်က နံမည်အကြီးဆုံးသင်တန်းတစ်ခု ဖြစ်နေပါတယ်။ကျွန်တော်တို့ မြန်မာနိုင်ငံမှာက များသောအားဖြင့် နံမည်ကြီးဟိုတယ်သင်တန်းရဲ့ CERTIFICATE ကိုပဲ မက်မောကြပါတယ်။ သူ့နေရာနဲ့သူတော့ Certificate ကအရေးကြီးပါတယ်။ ဒါပေမယ့် Certificate ကောင်းကောင်းရှိနေပြီး ရှိသင့်တဲ့ အရည်အချင်းမရှိဘူးဆိုရင် လုပ်ငန်းခွင်မှာ အခက်အခဲတွေနဲ့ ကြုံတွေ့ရမှာ ဖြစ်ပါတယ်။ ရှိသင့်တဲ့အရည်အချင်းကို အပြည့်အ၀ပိုင်ဆိုင်ထားမယ်ဆိုရင်တော့ ဒီနိုင်ငံမှာ မိမိဘ၀တိုးတက်ပြောင်းလဲဖို့ အချိန်အနည်းငယ်ပဲ လိုပါတယ်။ နံမည်ကြီး Certificate တွေမကိုင်ထားပဲ ဒီမှာကောင်းမွန်တဲ့အလုပ်ရရှိသွားသူတွေ အများကြီးရှိပါတယ်။ ဒါပေမယ့် ကိုယ့်မှာရှိနေတဲ့ အရည်အချင်းကိုတော့ ယုံကြည်ဖို့လိုပါတယ်။ ကျွန်တော်အလုပ်ရှာနေဆဲ ကာလမှာ ကျွန်တော့်မိတ်ဆွေတစ်ယောက် ပြောဖူးတဲ့ စကားကို အမှတ်ရမိပါတယ်။ (ခင်ဗျား ဘယ်အလုပ်ကို တကယ်ကျွမ်းကျင်လဲ။ Software Engineering လား။ Network Engineering လား။ Programming လား။ Heardware လား။ တကယ်ကျွမ်းကျင်တယ်လို့ ခင်ဗျားကိုယ်ခင်ဗျားယုံကြည်ရင် ၀င်အင်တာဗျူး၊ ခင်ဗျားအလုပ်မရရင် ကျွန်တော်ခင်ဗျားကို တင်ကျွေးထားမယ်) တဲ့။

ဆက်လက်ဖတ်ရှုရန်..

United Arab Emirate ကိုသွားမယ်ဆိုရင်

ယူအေအီးမှာဖြစ်သွားတဲ့ လူသတ်မှုတစ်ခုနဲ့ပတ်သက်ပြီး ကျွန်တော်တို့မြန်မာနိုင်ငံသားတိုင်း စိတ်မကောင်းဖြစ်ကြရပါတယ်။ ဒီမှာရှိနေတဲ့ မြန်မာနိုင်ငံသားတွေအပြင် မြန်မာနိုင်ငံက ဒီသတင်းကိုကြားတဲ့သူတိုင်း အဖြေမှန်ပေါ်လာဖို့ ဆုတောင်းနေကြပါတယ်။ နားစွင့်နေမိကြပါတယ်။ နိုင်ငံခြားမှာအလုပ်သွားလုပ်မယ့် လူငယ်တော်တော်များများလည်း စိုးရိမ်စိတ်တွေ ပိုလာကြပါတယ်။

ကျွန်တော်တို့ဟာ ဒီယူအေအီးကို Visit Visa နဲ့လာခဲ့ကြတဲ့သူတွေပါ။ ကိုယ့်နိုင်ငံမှာလည်း လုပ်ငန်းကိုင်ငန်းတွေ ဖြစ်ဖြစ်မြောက်မြောက် တိုးတက်မှုမရှိတော့ သူများနိုင်ငံကိုပဲ အားကိုးပြီးမျှော်လင့်ချက်တွေနဲ့ ရောက်လာကြတာပါ။ ဒီကိုရောက်ပြီး အလုပ်အကိုင်တွေကို စုံစမ်းတယ်။ ကိုယ်နဲ့အပ်စပ်မဲ့ ကိုယ့်ပညာနဲ့ ကိုက်ညီမှုရှိတဲ့ အလုပ်တွေကို ရှာဖွေကြပါတယ်။ ဒီလိုနဲ့ ရက် (30) မပြည့်ခင်မှာ ကျွန်တော်တို့ ကိုယ်စီကိုယ်စီ အလုပ်ရခဲ့ကြပါတယ်။ ကိုယ့်ရဲ့ကျွမ်းကျင်မှုအလိုက် အမြင့်မားဆုံးလစာကို ရရှိကြပါတယ်။ အလုပ်ကိုလည်း အချိန်အကန့်အသတ်နဲ့ပဲ လုပ်ကိုင်ကြရပါတယ်။

ကျွန်တော်ဟာ ဒီနိုင်ငံကိုမရောက်ခင်တုန်းက နိုင်ငံ (6) နိုင်ငံလောက်ကို တခြားအလုပ်ကိစ္စနဲ့ သွားလာဖူးပါတယ်။ ရောက်တဲ့နိုင်ငံတိုင်းမှာ အလုပ်လုပ်ကိုင်နေကြတဲ့ မြန်မာတွေကို ရှာဖွေပြီး မိတ်ဖွဲ့ပါတယ်။ အလုပ်အကိုင်တွေကို လေ့လာပါတယ်။ မေးမြန်းစုံစမ်းပါတယ်။ (အဓိကကတော့ ကျွန်တော့်အလုပ်နဲ့ပတ်သက်ပြီး ဒီနိုင်ငံတွေမှာ အဆက်အသွယ် ရယူဖို့ပါ။) ဒီလိုကျွန်တော်စပ်စုတတ်လို့လည်း နိုင်ငံစုံက အလုပ်အကိုင်အကြောင်းတွေကို အမျိုးမျိုးသိလာရပါတယ်။ အချို့အချို့နိုင်ငံတွေမှာ...
နိုင်ငံသားခွဲခြားမှုတွေ ပြင်းထန်ပါတယ်။ နိုင်ငံခြားသား အလုပ်သမားတွေကို ဖိနှိပ်မှုတွေရှိပါတယ်။ ကျွန်တော်တို့ရဲ့ မြန်မာသံရုံးရှိနေတာတောင် ဒုက္ခရောက်ရတဲ့ မြန်မာနိုင်ငံသားအလုပ်သမားတွေရှိနေတဲ့ နိုင်ငံတွေ အများကြီးရှိပါတယ်။ ယူအေအီး (ဒူဘိုင်း) မှာ မြန်မာသံရုံးမရှိပါဘူး။ ဒါပေမယ့် အလုပ်သမားအခွင့်အရေးကိုတော့ တခြားနိုင်ငံတွေနဲ့ မတူပဲ ရရှိကြပါတယ်။

ကျွန်တော်တို့ကို ဒီနိုင်ငံမှာအလုပ်သက်တမ်း (2) နှစ်၊ (3) နှစ်စသည်ဖြင့် စာချုပ်ချုပ်ရပါတယ်။ အဲဒီစာချုပ်သက်တမ်းမပြည့်ခင် အလုပ်သမားကလဲ ထွက်လို့မရသလို၊ အလုပ်ရှင်ကလည်း ထုတ်ပိုင်ခွင့်မရှိပါဘူး။ တကယ်လို့ အလုပ်သမားက ထွက်ချင်ရင် လျော်ကြေးပေးရမှာဖြစ်သလို၊ အလုပ်ရှင်ကလည်း ထုတ်ချင်ရင် လျော်ကြေးပေးမှ ထုတ်ပိုင်ခွင့်ရှိပါတယ်။ တကယ်လို့ အဲဒီမူတွေကို မလိုက်နာဘူးဆိုရင် နစ်နာသူဘက်က တရားစွဲဆိုလို့ရပါတယ်။

ကျွန်တော်တို့ထဲက မိတ်ဆွေတစ်ယောက်ဆိုရင် သူရဲ့ပတ်စ်ပို့တ်ကို သူ့အလုပ်ရှင်က ဖျောက်ပစ်လိုက်ပါတယ်။ အဲဒါကိုကျွန်တော်တို့ရဲ့ မိတ်ဆွေက တာဝန်ယူပြန်လုပ်ပေးဖို့ပြောပါတယ်။ အဲဒါကို သူ့အလုပ်ရှင်က အနိုင်ကျင့်ပြီးမလုပ်ပေးနိုင်ကြောင်း၊ တာဝန်မယူကြောင်း မသိသလိုလျစ်လျူရှုပါတယ်။ ကျွန်တော်တို့ရဲ့မိတ်ဆွေခမျာလည်း စာချုပ်သက်တမ်းကလဲပြည့် ပတ်စ်ပို့တ်မရှိကလဲမရှိတော့ ပြန်လို့ကလဲမရနဲ့ အခက်ကြုံရပါတော့တယ်။ နောက်ဆုံးမှာသူလဲ သူငယ်ချင်းတွေရဲ့ တိုက်တွန်းချက်နဲ့ တရားရုံးမှာတရားသွားစွဲပါတယ်။ တရားရုံးကလဲ လိုအပ်တာတွေကို စုဆောင်းပြီး သူ့ရဲ့အလုပ်ရှင်ကို ဆင့်ခေါ်ပါတယ်။ ပထမတော့ အဲဒီလူမလာပါဘူး။ ဒါပေမယ့် တရားရုံးက မလာရင်သူ့လုပ်ငန်းကို ပိတ်ပစ်မယ်လို့ စာပို့လိုက်တော့မှ အဲဒီလူလာပြီးတရားရင်ဆိုင်ပါတယ်။ နောက်ဆုံးမှာ သူကျွန်တော့်မိတ်ဆွေကို ပတ်စ်ပို့တ်စာအုပ်ပြန်လုပ်ပေးလိုက်ရပါတယ်။ ကျွန်တော်တို့ မြန်မာနိုင်ငံသား အနိုင်ရရှိသွားပါတယ်။ ကျွန်တော်ပြောချင်တာက ကိုယ့်ဟာကိုယ်ဆုံးဖြတ်ပါ။ နိုင်ငံတိုင်းမှာ ဥပဒေရှိပါတယ်။ ကိုယ့်နိုင်ငံမှာ အလုပ်အကိုင်မကောင်းလို့ တခြားနိုင်ငံမှာ စီးပွားလာရှာတယ်။ သူများလက်အောက်မှာ အလုပ်လာလုပ်တယ်။ ကိုယ့်နိုင်ငံနဲ့ လူမျိုးကိုဂုဏ်ရှိအောင်
မြှင့်တင်ပါ။ နိုင်ငံခြားလောကကို အသေအချာလေ့လာပါ။ ဆောင်ရန်၊ ရှောင်ရန်တွေကို အမြဲတမ်းသတိရနေပါ။ ဒါပါပဲ။

ဆက်လက်ဖတ်ရှုရန်..